Alkatearen mezua

Igorreko Alkatea

Eskerrak emon gura deutsuedaz gugan jarri dozuen konfiantzagaitik. Lau urte daukaguz aurretik, herriaren egunerokotasunean hobetzeko eta hemendik urte batzuetara izango garenaz gogoeta egiteko.

Udal langileen eta herritarron borondateagaz Udal administrazinoa herritarren etxeetan sartzeko ahaleginak egingo doguz.

Tramite administratiboak internet bidez egiteko aukera gero eta hurrago daukagu eta sistema barrira moldatzeko prestaketa lanetan gabiz. Holango tresna batek herritarren artean be zelanbaiteko informazino eta prestaketa eskatuko dituelakoan gagoz eta horretan be bagabiz.

Batetik, herritarrok informatuta egoteko beharra daukagulako eta horretarako web gunea indartzea (plenoen bideoak, informazino bisuala… eta sare sozialak martxan ipintea ezinbesteko ikusten ditugulako.

Legegintzaldi honetan, parte hartzea sustatu gura dogu; inkestak egin, udaleko komisinoetan lantzen gabizen gaiak herrira zabaldu eta herritarrak erabagien indargune izan daitezan. Horretarako bide barriak martxan zelan ipini aztertzen gabiz, eretxi bilketak egin eta kudeatzeko, danon gustoko ebatziak lortzea gatxa dan arren, ahaleginak merezidu daualako.

Kontuak garbi plazaratzea izan da orain arte behar egiteko modua: Eskura doguzan baliabide guztiak erabiliko doguz kalea eta udaletxea uztartzeko: Hamabosteroko jendaurreko plenoak, bandoak, iragarki taulak, igorre.net, kultur etxean dagoan panel erraldoia…

Udalak herritarrengandik hur egon behar dau, bulegoan jarrita ez eze, alkateak herritarrakaz hartu-emon zuzena eukiko dau, kalean zuen gogoetak entzuteko prest egoteaz aparte, udaleko telefonora deitu eta zuen izena eta telefonoa itxi ezkero, Alkatetzatik erantzuna jasoko dozue egun berean ez bada, astean bertan.

Herritarren gogoetak, arazoak, ideiak zein ardurak entzutea lehentasunezko gaia dalako guretzat. Udalean zinegotzi talde ederra gagoz herriarentzako  lan egiteko prest eta herritarren ordezkari izateaz gain, herriaren ahotsa egunez egun udalera ekarteko ardura eukiko dogu.

Alkarlanean behar egin eta etorkizuneko ilusino eta proiektuak danon artean garatu. Eskutik hartuta joan behar dabe kaleko elkarrizketak eta teknologia barrien bitartez herritarrok egin geinkezan ekarpenak, handiak zein txikiak, danak diralako ondo etorriak.

Gu lanean gabiz baina lan horren fruituak ikusi artean pazientzia eskatuko deutsuet Zinegotzi guztien izenean.

Edozer behar badozue badakizue non nagoen.

Beinat Anzola

  • Eustat
  • Arratiako Mankomunitatea
  • Bizkaiko Foru Aldundia